52
David: Yusru ami turamurmin pachisan tuke maaketai titatjame timiauri
Saulo inatiri Davidtan sacerdote jeen wainak Saulon ujakmia nuna pachis Davidka ju kantan aarmiayi.
1 ¿Warukaya timiá kakaram autiatmesha pasé turamiame nu pachismesha wi aitkajai tame?
¡Yuse wait anengkratairingkia nangkaankashtinuitai!
2 Ameka tuke tunau nintimsam pujau asam,
ami inaijmikia kuchí ere tsakamua tumawaitai.
Tumau asamtai anangkartutai chicham chichaame.
3 Pengker aa nuka nintimtsuk pasé aa nuke timiá nintimme.
Turakum nekas chichamka wakerutsuk,
wait chichama nuke wakerame.
4 Anangkartutai chicham chichau asam,
tuke pasé chicham aa nuke timiá wakerame.
5 Tura asakmin Yus amincha tuke mengkaatmaktinuitai.
Tura amin achirmak ami jeemnia jiirmaki mantamaatnuitai.
6 Yusen umirin ainau nuna wainkar shamkartin ainawai.
Antsu nu aintsun pachisar wishikinak:
7 Au aintska jiistaram.
Nuka Yus ayamrukmaunka nintimtsuk,
antsu ni kuikiarin nintimias tuke tunaun nintimui tiartinuitai.
8 Antsu wikia numi olivo samek wajawa nunisnak Yuse jeen pujajai.
Tura asan wikia tuke Yuse anengkratairin nintimratatjai.
9 Yusru ami turamurmin pachisan tuke maaketai titatjame.
Ame pengker asakmin,
amin umirtaminak pujuinamunam tuke amincha nintimtustatjame.