32
David: Yus tsangkutrurta titin nekas pengkeraitai timiauri
1 Yus aintsu tunaarin mash sakar tsangkuramu asa,
nu aintska waraawai.
2 Tura nu aintsu tunaarin mash sakturu asa,
Yuska ni tunaarinka nintimtatsui.
Tura asamtai nu aintska nekas waraawai.
Tura wina tunaaruka atsawai tusa nekas pengker pujawai.
3 Antsu wina tunaarun uukan etsertsuk pujaknaka,
kintajai metek jakamin nekapeakun wake mesekan pujuyajai.
4 Apuru tsawaisha tura kashisha napchau nintimrati tusam,
wi wait wajaktin surusu asakmin,
yangkur tsaa sukuam kaawa nunisnak nekapeakun,
wina kakarmarka pengké atsumiayi.
5 Tura asamtai wikia nintimran:
Apurun tunaarun ujaktajai tusan,
wina tunaarunka mash uutsuk amin ujakmiajme.
Wi turamtai wina tunaaruka mash tsangkutrurmiame.
6 Tura asamtai Yus umirkau ainautikia wake mesekar nintimrar,
nujang nungkan amurmanum ujungmawa nunisrik jakatatjiapi tu nintimrar pujakrikia amek seamnawaitji.
Tura nujang aintsu pujutirin amurmawa nunisang nekapeayatrik ataksha entsa kuyuak ukukmiawa nunisrik uwemratnuitji.
7 Ameketme wina ejarkatnumka.
Itiurkachmin pujamtaisha wina ayamrutkatnuitme.
Tura wina angkanmamtikruau asakmin, warasan kantan kantamruatnuitjame.
8 Wina Apur chichartak:
Wikia amin wainjame,
tura amincha chicharjame,
tura amin nuiniartasan:
Juwaitai jinta tusan nekamtikiatjame turutui.
9 Kawai tura burro nintinchau asamtai,
aints jirujai jangken jingkiawar,
mai japi mai japi awajmawa nunisrumka airap.
Antsu nu tangku ainauka
jingkiatskeka atumin winichartin ainawai.
10 Pasé aints ainauka nukap wait wajakartin ainawai.
Antsu Yus nekasampita tinu ainautinka ii Apuri tuke wait anentramak waitmaji.
11 Pengke aints ainautiram tura anangmichu ainautirmesha,
atumi Apuri turamuri nintimraram warastaram.
Tura pengker nintimu asaram,
waraakrum kanta kantamataram.