30
David: Yusen maaketai timiauri
1 Apuru wina angkanmamtikruau asakmin,
maaketai tajame; tura wina nemasur ainau wishikrarai tusam surimruku asakmin maaketai tajame.
2 Apuru wina Yusur asam,
wi seam tsuwaramiame.
3 Apuru ame jakai tusam wina uwemtikrurmiame,
tura tsaarta tusam pujut surusmiame.
4 Yus umirkau ainautiram,
Yus nintimsaram kantamataram.
Tura ni naari nekas pengker aa nu pachisrum:
Yus juuntaitai titaram.
5 Yuska nukapka kajechu asamtai,
ni kajekmauri wári nangkankatnuitai.
Antsu ni wait anengkratairingkia tuke nangkankashtinuitai.
Kashi juutkur pujayatrik tsawaarkurkia warastinuitji.
6-7 Yusru wina pengker awajtusu asakmin,
wikia yaanchuik wiki nintimsanak:
Maj,
wikia tuke angkan pengker pujustinuapitja timiajai.
Turayatun ame yaintsuk pujakmin,
wikia sapijmiakun napchau nintimsan pujumiajai.
8 Apuru amin seajme,
tura amin untsuajme.
9 Wi jakamtaisha ¿winasha pengker awajtustinkitam? Tura wina namangkrun iwiartusaramtaikia,
¿wikia amincha maaketai titinuashitjam?
Jakaru ainauka aminka maaketai turamiarchatnuitai,
tura ameketme pengkeram turamiarchatnuitai.
10 Apuru anturtukam,
tura wait anentruram yainkata.
11 Apuru wina juutmaur mengkatruku asakmin,
yamaikia waraajai.
Tura jakamin nintimaur yapaijturau asakmin,
yamaikia aints entsatin shiirman entsar,
fiestanam weawa nunisnak wikia waraajai.
12 Tura Apuru wina Yusur asakmin,
yamaikia chichatsuk pujustatkaman tujintajai.
Antsu warasan kantan kantamruatjame,
tura amin tuke maaketai titatjame.