145
David: Yusru ami kakarmarmin pachisan chichastatjai timiauri
1 Yusru wina Apur asakmin,
ami kakarmarmin pachisan chichastatjai.
Tura ami naarmin pachisan:
Ameketme juuntam titatjai.
2 Aminka kintajai metek:
Ameketme pengkeram titatjai.
Tura tuke amin naarmin pachisan warartustatjame.
3 Ii Apuri asam nekasam juuntaitme.
Tura asakmin mash aints ainau:
Ameketme juuntam turamiarti.
Tura timiá juun asakmin,
iikia warukuita tusar nintimratatkamar tujintaji.
4 Aints ainau ni uchiri ainaun nuininak ami turamurmin pachisar:
Nuka nekas pengker ainawai tiartinuitai.
Nunia ami kakarmarmijai najanamiame nunasha pachisar ni uchiri ainaun ujakartin ainawai.
5 Tura asaramtai aints ainau mash ami paaniurmin tura ami kakarmarmincha pachisar chichasartin ainawai.
Turinamtai wisha ami wainchati takatrumin pachisan chichastatjai.
6 Tura ami kakarmarmijai ami nemasem ainau nepetnuyame nuna pachisar chichasartin ainawai.
Turinamtai wisha amin pachisan:
Yus juuntaitai tusan aints ainaun ujaktatjai.
7 Wi ujaam,
aints ainau amin pachitmasar:
Yus timiá pengkeraitai tiartinuitai.
Tura kantan kantaminak:
Yuska pengké tunaachawaitai tiartinuitai.
8 Ii Yusringkia jaimias aints ainautin wait anentramji.
Turasha wári kajechu asa iincha tuke anenmaji.
9 Ii Apuringkia mash aints ainautin pengker awajtamsatas wakerutmaji.
Tura ni najanamurinka mash jaimias wainui.
10 Apuru ami najanamurmin pachisar aints ainau mash warasarti.
Tura amin umirtaminak pujuinauka mash amin warartamsarti.
11-12 Tura aints ainau mash ami kakarmarmin pachisar chichasarti,
turasha ame aints ainau timiá pengker inamurmin
pachisar warasarti.
Tura amin pachitmasar:
Mash nungkanmaya ainaun nekas pengker inawai turamiarti.
Nunia ami paaniurmincha pachisar chichasarti.
13 Aminu inamtairumka pengké nangkankashtinuitai.
Tura asamtai ameka aints ainauka tuke inangnatsuk inartinuitme.
14 Ii Apuringkia jakaartas wakerinauncha kiakartinuitai.
Tura mianchawaitjai tumamin ainauncha inankitnuitai.
15 Apuru mash iwiaaku ainauka yutairin yuuminak surusat tusar amin nakarminawai.
16 Tura uwejem yapaarakminka,
mash iwiaaku ainau tutuarar pujuinawai.
17 Ii Apuringkia aints ainautinka tuke mash metek jiirmaji.
Turasha ni tura nunaka iin wait anentramak tuke turawai.
18 Ii Apuringkia ni seau ainautinka anturtamji.
Tura anangmichu ainau seamsha anturui.
19 Tura ii Apurinka:
Ameketme Apum tinu ainau wakeramurin umiktinuitai.
Tura Apuru yainkata tinamtaikia,
ni seamurinka anturkatnuitai tura uwemtikratnuitai.
20 Ii Apuringkia niin aneenaunka ejaktinuitai.
Antsu pasé aints ainaunka mengkaaktinuitai.
21 Wina jangkerjai wina Apurun tuke maaketai titatjai.
Tura mash nungkanmaya ainau ii Apuri naarin nekas pengker aa nuna pachisar:
Ameketme pengkeram tuke inangnatsuk tiartinuitai.