143
David: Apuru wi inintramur airkata timiauri
1 Apuru wi seamur anturtukta.
Turasha wi inintramur anturtukta.
Ame timiame nuka tuke umiktin asam,
wi seamur airkata.
2 Mash aints ainau tunaarintin ainawai tusam nekame.
Antsu wikia aminu inatiram asamtai,
winaka wait wajaktinka surusaip.
3 Wina nemasur ainauka wina papeetkar nungkanam ujuarmawa nutikruwarmayi.
Tura aints jakawa nunisang teenam pujusti tusar,
wina pasé awajtusarmayi.
4 Wikia timiá napchau nintimsan pujau asamtai,
nintirsha kurawai.
5 Wi yaanchuik pujuyaja nuna aneakjai.
Tura ami turamurmin mash nintimjai.
6 Wikia nungka mujurua tumawaitjai.
Tura asan nungka mujuramtai,
aints ainau yumi jiturti tusar,
uwejen takuiniar amin seatmina nunisnak amincha seajme.
7 Apuru wina mayatair nangkantanak jasi.
Tura asamtai wári airkata.
Ame yaimkem suritrukaip.
Nu turakminka wikia jakawa nunisnak pujustatjai.
8 Wikia amin nintimsan pujau asamtai,
kashik shintaramtai,
ami anengkratairmin tu awai tusam nekamtikruata.
Tura ame nu jinta wekaasata tusam jintim nekamtikruata.
9 Apuru ameka wina ejarin asam,
wina nemasur ainamunmaya angkanmamtikruata.
10 Tura wina Yusur asam,
wina wakeramur najanata tusam nuiturta.
Ami Wakanim nekas pengker aa nu:
Ju jinta tupnik amakta tusa,
wina jintintruati tusan seajme.
11 Apuru pujut surusta tusan,
amin naarmin pachisan seajme.
Ame tuke pengker asam,
wi wait wajamunmayangka jiirkita.
12 Wikia ami inatiram asamtai,
wait anentruram wina nemasur ainauka nepetkam mash mengkaakta.