115
Ii Yusringkia nayaimpinam pujawai
1 Apuru timiá wait anengkratin asam,
tura nekas chicham nekamtikin asam,
aints ainauka iinka:
Pengkeraitme turamtsuk antsu aminak:
Pengkeraitme turamiarti.
2 ¿Warukaya aints ainau amin umirtamtsuk pujusarsha iincha:
Atumi Yusri tuwaita turaminaji?
3 Ii Yusringkia nayaimpinam pujawai.
Tura ni wakera nunaka mash umiawai.
4 Antsu Yusen umirkacharu ainau yusringkia kuritai nuniasha kuikaitai.
Ni yusri ainauka aints najanamu ainawai.
5 Ni yusri nakumkamuri jangkentin ainayat chichachu ainawai.
Tura jiintin ainayat wainmichu ainawai.
6 Tura kuwishtin ainayat antutnasha antichu ainawai.
Tura nujintin ainayat mayatchau ainawai.
7 Tura uwejentin ainayat achimchau ainawai.
Tura nawentin ainayat wekaichau ainawai.
Tura chichatsuk aya takamtaik puju ainawai.
8 Tura asaramtai aints ni yusrin najaninauka tura:
Ameka wina yusruitme tinu ainauka ni yusrijai metek ainawai.
9 Israel ainautiram,
Yusek nekasampita titaram.
Ningki iin yainmaktinuitji,
tura ejarmaktinuitji.
10 Sacerdote ainautiram,
Yusek nekasampita titaram.
Ningki atumin yainmaktinuitai,
tura ejarmaktinuitai.
11 Mash aints ainautiram,
ii Apuri:
Ameketme Yusem tinu asaram,
nekasampita titaram.
Ningki iin yainmaktinuitji,
tura ejarmaktinuitji.
12 Ii Apuri ni aintsri ainautin kajinmatramtsuk nekas pengker awajtamsatnuitji.
13 Tura juun ainau tura uchi ainausha niin:
Ameketme Yusem tinaunka nekas pengker awajsatnuitai.
14 Ii Apuringkia atumin nukap yujtamratnuitai,
tura atumi uchirincha nunisang nukap yujratnuitai.
15 Ii Apuri nayaimpin tura nungkancha najanamia nuka atumin pengker awajtamsati.
16 Nayaimpikia iinu Apurinuitai.
Antsu nungkanka aints ainautin suramsamiaji.
17 Yaanchuik jakaru ainauka chichakchamin asar,
iinu Apurinka maaketai tichartinuitai.
18 Antsu iikia iinu Apuringka yamaikia tuke maaketai titatji.
¡Ii Apuri warartusmi!