105
Israel ainaun Yus pengker awajsamuri
1 Ii Apuri maaketai titaram.
Tura ni naari pachisrum aints ainau ujaktaram.
Turuaram ni turamurisha mash aints ainau nekamtikiataram.
2 Ii Apuri pengker awajsatasrum kanta kantamataram.
Tura ni wainchati takatrin pachisrum chichastaram.
3 Tura ni naari pachisrum:
Yus pengkeraitai titaram.
Tura ii Yusri seakrumka tuke nintimjai warartustaram.
4 Tuke kintajai metek ii Apuri seataram.
Tura ni kakarmarisha wakerin ataram.
5-6 Atumka Yuse inatiri Abrahama weari ainiarme.
Tura Jacobo uchiri ainaun Yus wina umirtuktaram timiau asaram,
ni weari ainiarme.
Tura asaram Yus timiá kakaram asa,
wainchati takatan untsurin turamia nu nintimrau ataram.
7 Ii Yusringkia iinu Apurintai.
Ningki mash nungkanmaya ainaunka inawaitai.
8-9 Warang musaach nangkamaru wainiat Yuska Abrahaman wi turatatjai tímia nunaka pengké kajinmakchatnuitai.
Nuniasha ni uchiri Isaacan:
“Wi Yus asan tajame” tímia nunasha pengké kajinmakchatnuitai.
10-11 Yus Jacobon chicharak:
“Wikia nungka Canaán tutai amincha tura ami wearmincha susartatjai”,
tímia nunaka tuke sakarchatin asamtai,
Israela weari ainauncha tuke atumnau ati tusa akatar akupkamiayi.
12 Israela weari jumchik armiayi.
Tura asar iraawa nunisarang Canaán nungkanam wekaasarmiayi.
13 Tura chikich chikich nungkanam wekaa wekaakar,
nuni jear jumchik arusar ataksha chikich nungkanam jearmiayi.
14 Tuminau wainiat Yus niin pasé awajsarai tusa surimkamiayi.
Tura apu ainauncha chicharak:
15 “Wina umirtin ainauka paseeka awajkairap.
Tura wina chichamrun etserin ainauka wait wajaktinka susairap”, timiayi.
16 Tura nu nungkanam tsuka ati tusa,
árak ainau mash nerekcharti tusa suritkamiayi.
17 Turayat Josén chikich nungkanam surukarti tusa tsangkamkamiayi.
Tura asa Josén nuná eemak Ejiptonam akupkamiayi.
18 Antsu Josénka kársernum engkeenak jirujai nawen chanuntawar kuntujen jirujai jingkiawarmiayi.
19 Yus Josénka karanam tímia nuna umiatsaing,
¿wina chichamrun nekasash tiya? tusa nekapsatas nakasmiayi.
20 Nunia Ejipto apuri aintsun untsurin inarmia nu Joséncha angkanmamtikiamiayi.
21 Tura José wina jear tura winar ainia nunaka mash wainkati tusa inaikiamiayi.
22 Tura ni nungkari apuri ainaun nuiniarti,
tura yakta juuntri ainauncha ni nekamtarin nekamtikiawarti tusa inaikiamiayi.
23 Nunia Jacob,
chikich naari Israel,
Ejipto nungkanam jeamiayi.
Tura chikich nungkanmaya ayat nuni pujumiayi.
24 Nuni pujamtai Yus niin nukap yujramiayi.
Tura Ejipto ainau nangkamasarang kakaram wajasarti tusa kakamtikrarmiayi.
25 Antsu Ejipto ainau Israel ainaun nakitrarti tusa,
Yus nintimtikramiayi.
Tura Yuse aintsri ainaun anangkawarti tusa tsangkamkamiayi.
26 Nunia Moisésan tura ni yachí Aarónnasha untsuk Ejiptonam akupkamiayi.
27 Tura Yus akupkamu asar,
Moisés Aarónjai numi atsamunam wainchati takatan untsuri turuwarmiayi.
28 Yus Ejiptonam tsawai wainiat teen akupkamiayi.
Tura waininayat Ejipto ainau Yuse chichamenka pachischarmiayi.
29 Tura ni entsarincha numpa najatamiayi.
Turamtai namaksha mash kajingkiarmiayi.
30 Turasha parungkach ainau ni nungkarin tinamturti tusa,
tura apu peakrincha tinamrarti tusa akupkamiayi.
31 Tura Yus chichaamtai,
anchii tetejai pachinir mukuntiua nunisarang Ejipto nungkanam jearmiayi.
32 Nunia yumincha jitumtiktsuk micha kaya tumaun jijai pachimramun yakiiya kakeerarti tusa nungkanam akupkamiayi.
33 Yus turamtai Ejipto nungkanam uva naekri ainauncha mash tsurintrarmiayi.
Turamtai yurang higo tutaisha kakeekarmiayi.
Tura numi ainau kanawesha mash kupintrarmiayi.
34 Tura Yus ataksha chichaamtai,
manchi ainau kaunkarmiayi.
Timiá untsuri asaramtai nekapmartatkamawar tujinkarmiayi.
35 Tura asar ajanam arak arakmauncha mash amukarmiayi.
36 Nunia Yuse awemamuri kichik kichik jeanam waya Ejipto ainau uchiri eemkaurin maamiayi.
37 Nunia Yus ni aintsri ainaun Ejiptonmaya jiikmiayi.
Turamtai kurin takusar,
tura kuikiancha takusar,
timiá arák wekainayat juwicharmiayi.
38 Ni jiinkiaramtai Ejipto ainau sapijin wait wajainau asar warasarmiayi.
39 Nunia Yus mukuntiun ni aintsri ainaun uukat tusa akupkamiayi.
Tura kashi paan wekaasatniurinka ji kapaun akuptukmiayi.
40 Tura tsukaminak:
Iikia yuta yuumaji tinamtaisha,
nanamtin ainaun waachia tumaun akuptukmiayi.
Tura nayaimpinmaya maná pangka tumaun akuptukam yuwaar tutuararmiayi.
41-42 Nunia Moisés pampan awatiamtai,
pampanmaya yumi tsapuimiayi.
Tura entsa nunisang wej wajamiayi.
Yus yaanchuik ni inatiri Abrahaman chicharak:
“Ami wearam ainaun angkanmamtikiatnuitjai”,
tímia nunisang
43 ni aintsri ainaun Ejipto nungkanmaya jiikmiayi.
Yus turamtai mash warainak untsumkarmiayi.
44-45 Nunia Yus wina nuikiarturmaurun umirkarti tusa, ni aintsri ainaun chikich aints pujuarmia nuna nungkarin susarmiayi.
Tura ninu yaktari ainia nunasha mash susarmiayi.
¡Ii Apuri warartusmi!