Ri nabꞌe carta xutzꞌibꞌaj ri Pablo che ri Timoteo
1
Ri Pablo kuya pan rutzil uwach ri Timoteo
1 Riꞌin in Pablo, in taqoꞌn re ri Qanimajawal Jesucristo, intaqom lo ruma ri Dios Qakolobꞌenel y ruma ri Qanimajawal Jesucristo, ri qakubꞌam pana qakꞌuꞌx rukꞌ.
2 Kantzꞌibꞌaj pan waꞌ wa carta chawe riꞌat Timoteo, ri paqatzij wi at nukꞌajol chupa rubꞌiꞌ ri Cristo ma wuma riꞌin xakoj rubꞌiꞌ Rire. Chakꞌulu kꞌu ri unimal rutzil kꞌuꞌxaj, ri relej kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
Pixabꞌanik puwi taq ri kꞌutunik na ubꞌe taj
3 Kꞌuna chakꞌuꞌx ri ximbꞌiꞌij kan chawe echiriꞌ e riꞌ kinꞌek Macedonia: E katkanaj kan chupa ri tinamit Éfeso ma chiriꞌ e kꞌo jujun tikawex lik junwi ri kakikꞌutu chwa ri kaqakꞌut riꞌoj. Ximbꞌiꞌij kꞌu kan chawe kebꞌataq che na kakiꞌan ta chi waꞌ.
4 Yey ximbꞌiꞌij kan chawe kabꞌiꞌij chike ri hermanos makiya ne kinaꞌoj puwi taq ojer tzijobꞌal na petinaq ta rukꞌ ri Dios y taq ri kakibꞌololej kibꞌiꞌ katiꞌ-kimam re ojertan, ma taq laꞌ kukꞌam lo sachibꞌal naꞌoj y na katoꞌbꞌ ta che ri karaj kuꞌan ri Dios qukꞌ, yey waꞌ kuꞌana xew ruma ri kubꞌulibꞌal qakꞌuꞌx rukꞌ Rire.
5 Rukꞌuꞌxibꞌal ri kojutaq ri Dios che e waꞌ: Lik kꞌax kaqanaꞌ qibꞌ chiqawach. Yey chaꞌ kaqaꞌan waꞌ chirajawaxik lik kalax pa qanimaꞌ kaqaꞌan ri utz, kaqamaj usukꞌ saꞌ ri utz yey e kaqaꞌano, y paqatzij wi kakubꞌiꞌ qakꞌuꞌx rukꞌ Rire.
6 Noꞌj e kꞌo jujun kiyaꞌom kan ri karaj ri Dios; xkijalkꞌatij kꞌu ri kinaꞌoj y woꞌora xew kechꞌaꞌt chwi ri na jinta uchak.
7 Rike kakaj kakiꞌan e aj kꞌutunel che kibꞌ chwi Rutzij Upixabꞌ ri Dios, tobꞌ na kakimaj tane usukꞌ ri kakibꞌiꞌij y na kakimaj tane usukꞌ ri kꞌutunik lik kakijikibꞌaꞌ uwach.
8 Pero riꞌoj lik qetaꞌam lik kꞌo kutiqoj Rutzij Upixabꞌ ri Dios we jusukꞌ kaqachapabꞌej.
9 Qetaꞌam kꞌut ri Tzij Pixabꞌ na xyaꞌiꞌ taj re kuqꞌat tzij pakiwi ri jusukꞌ kibꞌinik kisilabꞌik; ma xyaꞌik re kuqꞌat tzij pakiwi ri e aj palajiy tzij y ri na e ta kojol tzij, ri na jinta xiꞌin ibꞌ kukꞌ chwach ri Dios y ri e aj makibꞌ, ri na kebꞌok ta il che kakiloqꞌnimaj uqꞌij ri Dios y ri kakikꞌaq bꞌi uqꞌij ri Dios; ri e kamisay kichu-kiqaw kukꞌ ri e kamisanel,
10 ri kaketzꞌabꞌej uwa kiqꞌij kukꞌ jujun chik na kikꞌulel taj, rachijabꞌ kakiꞌan kikꞌulel chike kach achijabꞌ, ri kekichap winaq y na kekitzoqopij ta uloq we na kayaꞌiꞌ ta puaq chike, raj raqꞌul, ri kꞌo kakijikibꞌaꞌ uwach chupa rubꞌiꞌ ri Dios yey xa raqꞌubꞌal ri kakiꞌano, kukꞌ taq kꞌu konoje ri kakipalajij ri saqil kꞌutunik re ri Dios.
11 E kꞌutunik waꞌ kꞌo chupa ri chomilaj Utzilaj Tzij re ri Dios. Yey ri Dios, ri lik nim uqꞌij, e xyaꞌw waꞌ panuqꞌabꞌ riꞌin chaꞌ kantzijoj.
Ri Pablo kutioxij ri rutzil ukꞌuꞌx ri Dios
12 Riꞌin kantioxij che ri Qanimajawal Jesucristo ma uyaꞌom nuchuqꞌabꞌ chaꞌ kanꞌan ruchak y ma xkubꞌiꞌ ukꞌuꞌx wukꞌ echiriꞌ xuya wa jun chak chwe,
13 tobꞌ rojertan riꞌin lik xinmakun chirij ri Qanimajawal Jesucristo ma xebꞌenuternabꞌej ri kikojom rubꞌiꞌ y lik xebꞌenuya pa taq kꞌaxkꞌobꞌik. Na rukꞌ ta kꞌu riꞌ, ri Dios xjuchꞌ kaꞌn ukꞌuꞌx chwe; ma echiriꞌ xinꞌan waꞌ, kꞌamajaꞌ kakubꞌiꞌ nukꞌuꞌx rukꞌ ri Cristo y na xinmaj ta kꞌu usukꞌ we ri kanꞌano na utz taj.
14 Yey ri Qanimajawal lik xukꞌut ri unimal rutzil ukꞌuꞌx chwe y xuya chwe kakubꞌiꞌ nukꞌuꞌx rukꞌ y xuya chwe kankꞌut ri rutzil ukꞌuꞌx Rire; y waꞌ xew ri Qanimajawal Jesucristo kayaꞌw re.
15 Ekꞌu wa kambꞌiꞌij lik qatzij y lik taqal che kakikoj konoje ri tikawex: Ri Qanimajawal Jesucristo xkꞌun che ruwachulew chaꞌ kebꞌoluꞌkolobꞌej konoje raj makibꞌ. Ekꞌu riꞌin in jun chike waꞌ; yey chinuwach riꞌin, in ne ri más kꞌo numak chikiwa rike.
16 Ekꞌu ri Qanimajawal Jesucristo xukꞌut ri kꞌaxnaꞌbꞌal ukꞌuꞌx chwe riꞌin ma xukuy numak tobꞌ lik in aj mak. Jelaꞌ xuꞌano chaꞌ kaqꞌalajin ri rutzil ukꞌuꞌx chike konoje ri kekojow rubꞌiꞌ. Ma ri xuꞌan wukꞌ riꞌin e kꞌutubꞌal re ri kuꞌan kukꞌ ri kakubꞌiꞌ kikꞌuꞌx rukꞌ Rire, kukuy kꞌu kimak y kuya kikꞌaslemal na jinta utaqexik.
17 Ruma kꞌu waꞌ, qaloqꞌnimaj uqꞌij ri Dios waqꞌij ora y chiqawach apanoq.
Ma ri Dios Qajawxel
na jinta utaqexik rutaqanik,
na jinta utaqexik rukꞌaslemal,
na kilitaj ta uwach,
xew Rire e Dios
y retaꞌam ronoje.
Lik kꞌo yakbꞌal uqꞌij y unimal uchomalil.
18 Woꞌora Timoteo, kanya wa taqanik chawe riꞌat at nukꞌajol chupa rubꞌiꞌ ri Cristo: Chachuqꞌubꞌej awibꞌ chupa ri chak yaꞌom paqꞌabꞌ e chirij ri xqꞌalajisax pawiꞌ riꞌat chwi rachak chwach ri Dios.
19 Chatikibꞌaꞌ kꞌu ri kubꞌulibꞌal akꞌuꞌx rukꞌ ri Cristo y chamaja usukꞌ saꞌ ri utz y e chaꞌana riꞌ. Ma e kꞌo jujun na xkiꞌan ta waꞌ, y ruma kꞌu riꞌ xsach ri kubꞌulibꞌal kikꞌuꞌx rukꞌ ri Cristo y na kakikoj ta chi ne ri Qꞌijsaq.
20 Jenewaꞌ xkiꞌan ri Himeneo y ri Alejandro. Ruma kꞌu riꞌ, xebꞌenuya puqꞌabꞌ ri Satanás chaꞌ kakitij kꞌax y jelaꞌ kakimaj usukꞌ na utz taj kechꞌaꞌt chirij ri Qꞌijsaq re ri Dios.