7
1 E uwariꞌche, hermanos, ruma taq wa bꞌiꞌtisinik uꞌanom lo ri Dios chiqe, qajosqꞌij qibꞌ che taq ri mak retzelam ri qacuerpo y ri qanimaꞌ. Rukꞌ jun xiꞌin ibꞌ chwach ri Dios qachuqꞌubꞌej qibꞌ che uchomaxik ri qabꞌinik qasilabꞌik chwach ri Dios.
Ri Pablo kakiꞌkot ruma ri xuta che riglesia kꞌo Corinto
2 Chojkꞌola ko chikꞌuꞌx alaq; ma riꞌoj na jinta junoq qaꞌanom ri na usukꞌ taj che, na jinta junoq tzaqinaq pa mak quma riꞌoj yey na jinta junoq qasokosoꞌm.
3 Ekꞌuchiriꞌ kambꞌiꞌij waꞌ, na e ta re kanya kꞌix alaq; ma pachaꞌ ri nubꞌiꞌim lo che alaq, lik kꞌo alaq pa qanimaꞌ. Tobꞌ kꞌu oj kꞌas riꞌ o tobꞌ ne oj kaminaq chik, xa jun qakꞌuꞌx ukꞌ alaq.
4 Lik kanqꞌalajisaj ri kꞌo pa wanimaꞌ chiwach alaq, ma lik kubꞌul nukꞌuꞌx ukꞌ alaq. Lik kinkiꞌkot che alaq. E ne ralaq ri xnimarisan nukꞌuꞌx y woꞌora nojinaq ri wanimaꞌ che kiꞌkotemal tobꞌ oj kꞌo pa taq kꞌaxkꞌobꞌik.
5 Chwi xojkꞌun Macedonia, paqatzij wi na oj uxlaninaq taj. Ma tobꞌ xa pa taq xpe wi ri kꞌax paqawiꞌ, xpe taq chꞌaꞌoj chiqij y lik xok xiꞌin ibꞌ pa qanimaꞌ.
6 Pero ri Dios, ri bꞌochiꞌinel ke ri paxinaq kikꞌuꞌx, e xbꞌochiꞌin qakꞌuꞌx ruma rukꞌunik ri hermano Tito qukꞌ.
7 Na xew ta kꞌu ruma rukꞌunibꞌal xojkiꞌkotik; e lik xojkiꞌkotik ma xqato rire lik xkiꞌkot ri ranimaꞌ uma ralaq. Ma xubꞌiꞌij chiqe e lik kaꞌaj alaq kil alaq nuwach, lik kabꞌison alaq ruma inyaꞌom alaq pa bꞌis y lik kaꞌaj ne alaq kakꞌut alaq ri rutzil kꞌuꞌx alaq chwe. Ruma taq kꞌu waꞌ, riꞌin más xinkiꞌkotik,
8 tobꞌ ne xubꞌisoj nukꞌuꞌx echiriꞌ xintaq bꞌi ri nabꞌe nucarta che alaq, ma waꞌ xukoj alaq pa bꞌis kebꞌ oxibꞌ qꞌij. Pero na jinta chi kubꞌiꞌij nukꞌuꞌx che, ma wetaꞌam ri carta lik kꞌo xutiqoj che alaq.
9 Ekꞌu woꞌora lik kinkiꞌkotik, na ruma ta ri xbꞌison alaq che ri nucarta, ma e ruma ri bꞌis alaq xutoꞌ alaq chaꞌ katzelej tzij alaq, yey wa bꞌis e xraj riꞌ ri Dios che alaq. Jekꞌulaꞌ na jinta juna kꞌax xqaꞌan riꞌoj che alaq.
10 Ri bꞌis petinaq rukꞌ ri Dios e kuꞌan chiqe kok chiqakꞌuꞌx ri qamak, chaꞌ jelaꞌ kukꞌam lo tzelebꞌal tzij y kolobꞌetajik chiqe y ¡waꞌ na kuya ta bꞌis che junoq! Noꞌj ri bꞌis re ruwachulew xa kukꞌam lo kamik.
11 ¡Chilape kꞌu alaq ronoje ri utz xukꞌam lo ri bꞌis alaq chwach ri Dios! Ma lik xok alaq il che waꞌ y xꞌaj kꞌu kaqꞌalajisaj alaq waꞌ chwe. Ekꞌu lik xpe oyowal alaq che wa jun mak y lik xꞌaj kꞌu kil alaq nuwach. Rukꞌ ronoje kꞌuꞌx alaq y rukꞌ xiꞌin ibꞌ, xya ibꞌ alaq che uꞌanik ri utz chwach ri Dios. Rukꞌ kꞌu taq ri xꞌan alaq, woꞌora kaqꞌalajinik utz ꞌanom ralaq.
12 E uwariꞌche, echiriꞌ xintzꞌibꞌaj bꞌi ri carta che alaq, xinꞌano na xew ta ruma ri jun xꞌanaw re ri na usukꞌ taj y na xew tane ruma ri jun xꞌan ri na usukꞌ taj che, ma xinꞌano e chaꞌ kakꞌut alaq chwach ri Dios: Paqatzij wi lik kok alaq il chiqe.
13 Ruma kꞌu xok alaq il che ri qacarta, lik xnimar qakꞌuꞌx. Yey uwiꞌ chi ri qakiꞌkotemal riꞌoj, e rukiꞌkotemal ri Tito, ma lik xnimarisaj lo alaq ukꞌuꞌx.
14 Riꞌin nuyakom chi qꞌij alaq chwach ri Tito y na kinkꞌix ta che ri nubꞌiꞌim. Ma ronoje ri kaqabꞌiꞌij che alaq lik qatzij; jekꞌulaꞌ riꞌ, janipa ri qabꞌiꞌim chi che ri Tito pawiꞌ ralaq, lik e xeꞌrila che alaq.
15 Ekꞌu ri kꞌaxnaꞌbꞌal ukꞌuꞌx ri Tito che alaq más kanimarik echiriꞌ kakꞌun chukꞌuꞌx rukꞌ xiꞌin ibꞌ pa animaꞌ alaq xkꞌul alaq y xya ibꞌ alaq che uꞌanik janipa ri xubꞌiꞌij che alaq.
16 Lik kinkiꞌkotik ma che ronoje lik kubꞌul nukꞌuꞌx ukꞌ alaq.