Ang Ikalawang Aklat ng
MGA HARI
Panimula
Sa Ikalawang Aklat ng Mga Hari ipinagpapatuloy ang kasaysayan ng nahating Kaharian ng Israel (Hilagang Kaharian). Nahahati ang aklat na ito sa dalawang pangunahing bahagi: 1) Ang kasaysayan ng dalawang kaharian mula sa kalagitnaan ng ikasiyam na siglo B.C. hanggang sa pagbagsak ng Samaria, at ang katapusan ng Hilagang Kaharian noong 722 B.C. 2) Ang kasaysayan ng Kaharian ng Juda (Katimugang Kaharian) mula sa pagbagsak ng Kaharian ng Israel hanggang sa pagkubkob at pagwasak sa Jerusalem ng hukbo ni Haring Nebucadnezar ng Babilonia, noong taóng 586 B.C. Ang aklat ay nagwawakas sa ulat tungkol kay Gedalias bilang gobernador ng Juda sa ilalim ng mga taga-Babilonia at isang ulat tungkol sa pagpapalaya kay Haring Jehoiakin ng Juda mula sa piitan ng Babilonia.
Naganap ang mga kapahamakang ito sa bansa sapagkat nagtaksil kay Yahweh ang mga hari at mga mamamayan ng Kaharian ng Israel at Kaharian ng Juda. Ang pagkawasak ng Jerusalem at ang pagkakadalang-bihag sa maraming taga-Juda ay ilan sa mahahalagang pangyayari sa kasaysayan ng Israel.
Si Eliseo ang propetang nangunguna sa aklat na ito bilang kapalit ni Elias.
Nilalaman
Ang nahating kaharian 1:1–17:41
a. Si Propeta Eliseo 1:1–8:15
b. Ang mga hari ng Juda at ng Israel 8:16–17:4
c. Ang pagbagsak ng Samaria 17:5-41
Ang kaharian ng Juda 18:1–25:30
a. Mula kay Ezequias hanggang kay Josias 18:1–21:26
b. Ang paghahari ni Josias 22:1–23:30
c. Ang mga huling hari ng Juda 23:31–24:20
d. Ang pagbagsak ng Jerusalem 25:1-30
1
Si Elias at si Haring Ahazias ng Israel
1 Nang mamatay si Ahab, naghimagsik ang Moab laban sa Israel.
2 Si Ahazias ay nahulog noon mula sa balkonahe sa bubungan ng palasyo niya sa Samaria at naging malubha ang kalagayan. Kaya nagpadala siya ng mga sugo sa Ekron upang isangguni sa diyos ng mga Filisteo na si Baalzebub kung gagaling pa siya o hindi.
3 Ngunit sinabi ng anghel ni Yahweh kay Elias na taga-Tisbe, “Salubungin mo ang mga sugo ng hari ng Samaria at itanong mo kung wala nang Diyos ang Israel at kay Baalzebub na diyos ng Ekron na siya sasangguni.
4 Sabihin mong hindi na siya gagaling sa kanyang sakit. Iyon na ang ikamamatay niya.” At lumakad nga si Elias.
5 Nang magbalik ang mga inutusan ng hari, sila'y tinanong nito, “Bakit kayo bumalik?”
6 Sinabi nila, “May nasalubong po kaming tao. Pinabalik niya kami at ipinapatanong sa inyo kung wala nang Diyos ang Israel kaya kay Baalzebub na diyos ng Ekron na kayo sasangguni? Hindi na raw kayo gagaling. Mamamatay na raw kayo sa sakit ninyong iyan.”
7 “Ano ang hitsura ng taong nagsabi nito sa inyo?” tanong ng hari.
8 “Mabalahibo po ang kanyang kasuotan at nakasinturon ng balat,” sagot nila.
“Si Elias iyon na taga-Tisbe,” sabi ng hari.
9 Ipinatawag ni Haring Ahazias ang isa niyang opisyal at ang limampung kawal nito upang dakpin si Elias. Natagpuan siya ng opisyal na nakaupo sa burol at sinabi nito, “Lingkod ng Diyos, ipinapatawag kayo ng hari.”
10 Sumagot si Elias, “Kung ako nga'y lingkod ng Diyos, umulan sana ng apoy at sunugin ka, pati ang iyong limampung kawal.” Umulan nga ng apoy at nasunog ang opisyal at ang mga kawal nito.
11 Nagsugo muli si Haring Ahazias ng ibang opisyal na may kasama ring limampung kawal. Ipinasabi niya kay Elias, “Lingkod ng Diyos, magmadali kayo, ipinapatawag kayo ng hari.”
12 Ngunit sinabi ni Elias, “Kung ako nga'y lingkod ng Diyos, umulan sana ng apoy at sunugin ka, pati iyong limampung kawal.” Ang Diyos ay nagpaulan uli ng apoy at sinunog ang opisyal at ang mga kawal nito.
13 Si Haring Ahazias ay nagpatawag uli ng isa pang opisyal at inutusan, kasama ng limampung kawal nito. Pagdating sa burol, lumuhod ang opisyal sa paanan ni Elias at nagsumamo, “Lingkod ng Diyos, maawa po kayo sa akin at sa aking limampung tauhan. Kami po ay inyong lingkod. Huwag po ninyong itulot na mamatay kami.
14 Alam ko pong tinupok ng apoy mula sa langit ang dalawang opisyal na nauna sa akin at ang kanilang mga kawal. Kaya nga po isinasamo ko sa inyo na hayaan ninyo kaming mabuhay.”
15 Sinabi ng anghel ni Yahweh kay Elias, “Sumama ka sa kanya at huwag kang matakot.” Sumama nga siya papunta sa hari.
16 Pagdating sa palasyo sinabi niya sa hari, “Ganito ang ipinapasabi ni Yahweh: ‘Sapagkat nagsugo ka ng mga tao upang sumangguni kay Baalzebub na diyos ng Ekron na para bang wala nang Diyos sa Israel, hindi ka na gagaling. Mamamatay ka.’ ”
17 Namatay nga si Haring Ahazias ayon sa ipinasabi ni Yahweh kay Elias. Wala siyang anak kaya si Joram na kanyang kapatid ang humalili sa kanya bilang hari ng Israel. Noon naman ay dalawang taon nang hari sa Juda si Jehoram na anak ni Jehoshafat.
18 Ang iba pang ginawa ni Haring Ahazias ay nakasulat sa Kasaysayan ng mga Hari ng Israel.